Munaasabad ballaaran oo si heersare ah loo soo agaasimay isla markaana ay iska kaashadeen qabanqaabadeeda Jaaliyada Soomaaliyeed iyo Ururka Ardayda laguna soo dhaweynayey doorashada Madaxweynaha cusub ee dalka Mudane Dr. Xasan Sheekh Maxamuud  ayaa Xalay ka dhacday Hoolka Shirarka Caalamiga ah ee Jaamacada Africa ee Magaalada Khartoum.

Munaasabadan oo ay kasoo qeybgaleen Masuuliyiin ka kala socday Safaarada Jabuuti , Xisbiga talada haya ee Dalkan Sudan , Mas’uuliyiin ka socotay Ururka Nabada iyo Horumarka ee uu madaxa ka yahay Madaxweynaha hadda la doortay ee dalka , Masuuliyiinta Jaaliyada Soomaaliyeed ee Dalkan Sudan iyo kumanaan arday ah ayaa kasoo qeybgalay xafladan .

Qunsulka Jabuuti ufadhiya Magaalada Khartoum Mudane Cali Ceelaabe Obsiye  oo Xafladan hadal kooban ka jeediyey ayaa umada Soomaaliyeed ugu Hambalyey talaabta horumarka leh ee ay qaadeen isagoo sheegay in wax lagu farxo ay tahay in doorasho dalka gudihiisa ay ka dhacdo isla markaana si Dimuqraadi ah loo soo doorto madaxweyne dalka ka saara kmg ah , waxa uuna ka codsaday Madaxweynaha cusub in uu ka shaqeeyo sidii uu u mideyn lahaa umadda Soomaaliyeed isla markaana uu wax uga qaban lahaa amniga una soo celin lahaa kala danbeynta.

Waxa uu Qunsulka sheegay in Dowlada Jabuuti marwalba ay walaalahooda Soomaaliyeed la garab taagantahay, isagoo tilmaamay in dawlada jabuuti ay si buuxda ula shaqeyn doonto madaxda cusub ee dalka.

Agaasimaha xarunta Aafaaq ee Warbaahinta Saalax Sheekh Ibraahiim (Dhiblaawe) oo ka mid ahaa dadkii ugu cadcadaa ee Munaasabada ka hadlay ayaa hambalyo ka dib tilmaamay in Madaxweynaha cusub looga fadhiyo sidii uu usoo dhisi lahaa xukuumad waxtar leh oo dalka kasaarta marxalada iminka uu ku jiro isagoo xusay inuu hubo in madaxweynaha uu  wax badan ka qaban karo xaalada dalka haatan uu ku suganyahay  .

Waxa uuna Madaxweynaha usoo jeediyey dhowr talo oo ay ugu horeeyaan soo dhisida Xukuumad tayo leh oo kooban uuna u tayeeyo ciidamada qalabka sida sii Soomaaliya ay dib ugu soo ceshato heybadeeda amaanka dalkana gacanta loogu dhigo.

Dr Aadan Azhari oo ka mid ahaa Masuuliyiinta wax kasoo abaabushay xafladaan ayaa goobta ka hadlay waxa uuna sheegay in Madaxweynaha uu si fiican ugaranayo hubana inuu yahay shaqsi ku haboon Masuuliyada loo doortay kana soo bixi kara , waxa uuna kula dardaarmay waxa ugu horeeya ee xukuumada uu soo dhisi doono ay qabanayso in ay noqoto sugida amniga iyo soo celinta nidaaamka iyo kala danbeynta.

Xafladaan Xalay ka dhacday magaalada tan Khartoum ayaa ahayd mid  si heersare ah loosoo agaasimay waxa ayna kusoo gabagabawday jawi heersare ah .